Sipas hanefive, therja e kurbanit për Kurban Bajram është obligim individual (vaxhib) për ata që përmbushin kushtet, dhe nuk ka përjashtim për familjet, pra çdo person i pavarur financiarisht e ka detyrë më vete. Imam Ebu Hanife e bazon këtë gjykim në dy argumente thelbësore:
1 – Urdhri i drejtuar Profetit Muhamed (a.s) në suren Keuther:
فَصَلِّ لِرَبِّكَ وَٱنْحَرْ
“Prandaj falu për Zotin tënd dhe ther kurban.” (Keuther, 108/2)
2 – Praktika e vazhdueshme të Profetit (a.s) dhe shokëve të tij.
Në rastin e medhhebeve të tjerë gjykimi është sunet muekkede (i fortë) dhe lënie e saj pa arsye është e urryer.
من كان له سَعَةً فلم يُضَحِّ، فلا يقربنَّ مُصلَّانا
“Kush ka mundësi, por nuk e ther kurbanin, le të mos i afrohet vendit tonë të faljes”. (Ibn Maxhe, nr. 3123)
Pra, ndërsa te hanefitë është vaxhib me kushte të caktuara, sipas juristëve të tjerë është sunet i fortë, jo detyrim. Por është mjaft e virtytshme që një person të therë një kurban për tërë familjen, sipas hadithit: “Profeti (a.s) theri një dash për vete dhe një për ymetin e tij.” (Ibn Maxhe, Edahi 2). Gjithashtu dijetarët theksojnë se megjithatë, nuk duhet neglizhuar pa arsye, sepse lënia e tij është e papëlqyer. /insi.al/
